Fluuughafe 😍

So mer sitze am Flughafe... Scho chli nervös aber vorallem fou Vorfreud! Scho wieder geits a es Endi vo de Wäut 😉 aso ja emu so vo de Flugziit her! 6h jetzt uf Dubai und denn 14h witter nach Christchurch... So zur Info es sind de ou wieder 12h Ziitverschiebig, aber das mau simmer de Voruss 😄

Nach länge 30 Stund... 7.1.15

Wow mer heis gschafft, ja mer sitze am Flughafe New Zeeland!

5h bi Nacht nach Dubai - 6h bi Tag nach Bankok - 9h wieder ir Nacht nach Sydney und de no legste 2h nach Christchurch mau wieder bi Tag! Es isch sehr läng gsi und oft eher chaut aber mer heiss gschafft unds Gepäck isch ou acho! 😄

Leider het Buchig vom Hostel nid klappt ga, üses Reisebüro hets für s falsch Datum reserviert ga und es isch usbucht gsi... Ja das het schnöu chli Nerve brucht, vorrallem so nach 30h Reise aber ja mer hei de es neus gsucht und das het de ou grad tiptop passet! Sehr es hübschs Hostel und s wichtigste es het 2 Bett ga... Nache me churze Znacht simmer de tot kaputt am 9ni go schlafe!

Route startet - Ziel Duniden, 8.1.15

Nervös und ir Hoffnig das mit de Bus Buchig klappt het, simmer nach eme churze Zmorge los gloffe zur Vermietig!
Und ja die hei e Reservation vo üs und en Bus parat! 😄

Nach föune Erklärige, Unterschrifte, Wahrnige usw. hemmers de endlich döffe ha und los isch gange! Ok ja das mit em Links Verkehr isch machbar aber scho u speziell! So langs grad us geit alles klar - bi grosse Chrüzige und Chreisel (vorallem Doppelspurige) so links ume z ga und wieder i die ling Spur z ga, brucht aber scho föu Konzentration!
Und ja Chrisechurch isch gross und nid so übersichtlich! D Sonja isch aber tiptop gfahre und ich ha wie en Weltmeister Karte gstudiert! Zum Glück hemmer so föu guti vo de Moni becho - danke!!!! Chrischurch het paar schöni Gägende isch aber haut immer no vorauem e riesigi Boustöu! 

Nach eme 1. gross Ichouf und mängem Verfahre simmer de uf de Autostrass richtig Süde los gfahre! Üses 1. Ziel Duniden und aui schöne Örtli dezwüsche! 

Timaru isch üse 1. grösser Stopp gsi, ganz en härzigi chlini Stadt grad am Meer! Es isch schöns Wetter aber windet sehr chaut, vorallem am Strand! Als nächst hemmer in Oamaru gstoppt um was z Esse! D Strecki isch alles meh oder weniger in Meer nöchi und alles Grad us... Mau geist ue mau abe aber süsch grad us... Flächene wie sie mir üs gar nid so chöi vorstöue und überall hets riesigi Küh & Schafs Härde!

So nach 5 Stund simmer fasch in Duniden acho! Da mer nid no mau hei wöwe dürs Wirrwar vonere Stadt fahre, hemmer en Camping userhalb gno! Nache eme churze und eifache Pasta z Nacht simmer doch recht müd und froh chömmer schlafe! Mau luege wis im Bus so isch ☺️

Morn werde mer üse Tag in Duniden verbringe und ou wieder ir Nöchi schlafe...

Dunedin - Albatross Colony - Purakaunui Bay, 9.1.15

5.30 isch Tagwach - Jetlag! Aber süsch hemmer ganz gut gschlafe! Bus und Matratze sind bequem und zum Glück hemmer richtigi Dechene, das scho recht chaut worde isch ir Nacht! Nach ere Duschi und eme Zmorge bi Sunneschii simmer Startklar für e neue Tag! Als 1. simmer go d "Baldwin" Strass aluege - die steilst Strass vor Welt mit ere Stiegig vo 35%. Nachher simmer id Stadt selber, Dunedin isch wirklich sehr hübsch! Föu hübschi Gebäude und e tolli Shopping Strass! Im Touristebüro hemmer grad mau en Bootstour bucht für de nächst Mäntig im "Milford Sound", nachher hemmer üs en Internet/Simkarte bsorgt und Gas zum ou chönne Choche!

Am Mittag hemmer üs de uf e Weg gmacht, d Halbinsel bi Dunedin abzfahre richtig Albatross Colony! En super schöni Strecki aues im Meer na und wer hes denkt am Endi hemmer ganz föu Albatross gse 😄
Ah und mer hei ou Seelöwe gse, obwohl mer se fast überseh hätte, da sie wie Stei usgsei!

Nachher zrugg in Dunedin hemmer üs uf e Weg richtug Süde gmacht uf en DOC Camping (die sind sehr günstig, liege immer a super Ort hend aber meistens nid meh als WCs). Nach 2h fahrt het de s Navi gmeint, mer müsste uf en Schotterpiste abbiege... Ab de isch losgange, alles grün, sehr einsam und sehr holprig mit 30 km/h. Aber das düre schüttle het sich glohnt, am Endi simmer ir "Purakaunui Bay" acho und es isch wunderschön gsi! Het scho ganz föu anderi Camper det ga, aber ohni Info gfindet mer aso de Platz aso nie, da fahrt ke Sau per Zuefall vorbie...
Ah und Internet/Empfang het mer ou nid! 
Mer hei üs de Supper gmacht und Würstli u Tee und de schön & recht chüh Abe am Meer gnosse!
 

Purakaunui Bay - Invercargill, 10.1.15

Nach ere ruhige Nacht und em Zmorge mit Meersicht, fahre mer wieder los mit em Ziel die südlichst Stadt Invercargill! Dezwüsche gits no paar Pünkt wo mer sicher wei stoppe! 
Es isch alles Schotterpiste, mir chöme aso nid so schnöu vorah aber mer ei ja ou Zit... 
Als ersts Stoppe mer bi de "Maclennan Falls" - nach 20 Marsch gse mer de ou scho dä schön Wasserfall! 
Als nächst Stoppe mer bim Lüchtturm am "Waipapa Point" sehr en windigi Sach! Mer hei ou da wieder Seelöie gse!
Bir witter fahr hemmer de endlich wieder asphalt Strasse, so das mer ou chli schnöuer vora chöme! Es isch en sehr sehr einsami Gegend und wenn mau es "Dorf" chunt, isch Hasli grad e Stadt degee... Ke ahnig wie die das da mit de Schou mache alles isch so wit e weg! 

Acho in Invercargill hemmer no mau paar Lebesmittel kouft und sind witter nach Riverton (die ältiste Stadt im Süde) hend üs da en Camping gsucht um no chlu z fuulenze... Leider regnets immer chli aber lese und hörbücher lose im Bus isch ou sehr gmütlich!

Räge, räge u räge im Tau vo de wöude Lupie, 11.1.15

Tagwach und ja es regnet no immer, mir mache üs auso uf e Weg nach Te Anu, de legste Stadt vor em Fjiord Milford Sound! Nach 2h Fahrt chöme mer in Te Anau a und göi mau was warms go Esse... Nach dem mer durch die sehr wenige Läde gschländerer sie mache mer üs wieder uf zum e Camping go suche! D Fahrt vo Te Anau nach Milford Sound duret 2.30h und es het mehreri DOC Camping uf em Weg det ene... Mir entscheide üs für eine vo de hindere, das mer am Morge nid so wit münd fahre! De Campung wer gloub sehr schön, direkt am ne See und überau blühe wöudi Lupie aber es het föu Nebu und ebe es regnet! 
Mir mache üs aso en Hörbuch und Skipo namitag! 😄

Milford Sound & Sunne, 12.1.15

Am Morge am 7ni isch Tagwach und es regnet ou nümme 😄
Warm wer andersch aber imerhi chunt d Sunne chli! Nachere Neburiche Fahrt simmer bald am See hinde und chönd üsi Schiffstour starte! Föu beidruckendi Felse, grossi Wasserfäu und klar blaus Wasser... Leider chamer nid gross Wandere, da die Felse eifach zu Steil sind... Also mache mer üs nach de Bootstour wieder uf e Rückweg! Jetzt bi Sunneschiin isch ou de Fahrt einiges schöner und mer sei paar tolli Sace! 
Üses nächste Ziel isch jetzt Queenstown, um am See d Sunne z gniesse!
D Strecki vo Kingston im See nah nach Queenstown isch miner Meinig nah s schönste wo mer bis jetzt gfahre sind! Nach 4h Fahrt simmer de uf eme u schöne DOC Camping direkt am Lake Wakatipu acho! Jetzt chöchele mer in churz Hose und gniesse s erste mau die Wärmi!!! Ou morn hemmer üs e Pousetag am See iplant! 😍

Süde vo Neuseeland und ersti Idrück

So mer hei de Süde ja jetzt abgfahre und göi langsam richtig Norde witter! Fazit: Dunedin & Queenstown sind die schönste Ortschafte gsi... Denn die witti vo allem isch sehr beeidruckend aber süsch ischs mer doch fasch chli zu föu Natur und sehr einsam das Ganze! Ou die wahnsinns Streckene wo mer da fahrt, wemmer nur zum nächste Städtli wett... Mir sie mit em Bus afe 4 Täg unterwegs und hei meh als 1000km gfahre - wahnsinn! 
(vom Benzin wo das brucht, rede mer jetzt mau gar nid!!!) 
Bi sehr gspannt uf e Gletscher und de Norde vo de Insle, mau luege was üs no so erwartet...

Sunnetag am See, 13.1.14

Tag bi 25 Grad am See...
Sunne und zmörgele in churze Hose! Das isch Sommer! Mir spiele Skipo, lese, liege am See und gniesses mau ke Meter mit üsem Büsli z fahre! De See da in Queenstown isch leider doch sehr chaut aber mir wages mit de Füss dri! Später het de d Sonja so z Gfühl ga sie het gern suberi Haar! Es isch ebe so dass uf dene DOC Campings weder Strom no Duschene git... Also wage mer üs tapfer i See und wäsche üs d Jahr! Ja üs z beobachte wär sicher lustig gsi aber ja es isch ebe wirklich chaut gsi!!!
Nach em gmütliche Znacht choche hemmer no e Spaziergang im See nah gmacht!

Schöns Städtli und fahrt nach Wanaka, 14.1.15

Mir druckse no im "Bett"ume, es isch bewöukt und zum ufstah simmer nid so motiviert! So geg die 9ni simmer de glich mau uf... Nach em zmorge hemmer zäme packt um no chli is Städtli Queenstown z ga! 
Uf em Weg det ene hemmer no für zwei Dütschi Taxi gspöut - lustugi Type gsi wo mau so für es haubs jahr eifach chli in Neuseeland umereise mit Trampe und immer mau wieder chli schaffe... Wie scho erwähnt Queenstown isch e sehr härzigi Stadt, direkt am See, chli und übersichtlich und es het föu schöni Restaurant, i eim hemmer de ou was Zmittag gässe! 
De isch witter gange nach Wanaka - ou es Städtli am Nachbarsee! I das ha ich mich grad verliebt... U süss direkt am See und rundume höchi Berge! Mer hei Glück und schiint soagr wieder chli d Sunne. Mir gönne üs es feins Gellato am See! Und wemmer das gwüsst hätte, hätte mer üsi Haar da gwäsche, den dä See isch föu wärmer! De simmer no churz is Reisebüro, es het überall so Infocenter, wo aues über d Altivitàt hei und eim ou buche! Eigentlich hemmer wöwe en 2-4 Wanderig uf em Franz Josef Gletscher mache, jetzt hends üs aber erklärt das sie das nur kombiniert mit Heli Toure mache und das kostet pro Person über 300.- tja das isch üs de doch chli z föu... Mir fahre jetzt glich mau richtig Gletsch um haut de eifach en Wanderig im Gletscher entlang z mache!
In Wanaka hets no es "Museum" de Tipp hemmer vo de Moni & Familie ga , s Puzzle World! Isch mega lustig gsi, es geit um Ilusione und es het es mega cools - echt schwierigs (vorallem für zwöi wo wenig orientierig hei) Labyrithn! Isch super gsi! Nachher simmer witter gfahre mit em Ziel zu üsem nächste DOC Camping! Dä isch eher chli im verglich zu disne aber ou direkt am See und es wunderschön! Mir campe auso wieder mit See sicht und leider ohni Internet... 

Wunderschöni Fahrt vo Camping zu Camping! 15.1.14 und mit föu Sandflöigä!

Sandfleuge, wirklich was grässlichs en mischig us stächende mugge aber so in schwärm wie fruchtfleuge und sie sind überall... Mit sind zwar wieder am uf eme herrliche camping (ohni internet und empfang) jetzt a de Westküste am "Lake Paringa" nach Haast und churz vor de beidne grosse Gletscher! Aber ebe Campe macht nur haub so Spass bi so föu Sandflüge und Antibrum höuft leider da ou nüd... En sehr netti neuseelanderi het üs zum glück e Paste gschenkt, die höuft und wert se ab aber da mer en paste nur uf hut cha strache, schwirre sie glich wie verrückt um üs ume!
Mir sie hüt vo Camping zu Camping gfahre und hei a föu schöne Ort haut gmacht, zum Bsp. bi de Blue Pools, wirklich en wunderschöne Ort, grad nach em Kaff Makarora! Blue Pools sind zwei Gletscherflüss wo ufenand treffe und no klarers, blauers und chöuters Wasser gits gar nid! Mega schön! Mir hei de ou en 3h Wanderig gmacht, vo Hängebrügg zu Hängebrügg durch das Flusstau! Anschliessend simmer witter gfahre zu eme Wasserfall und denn uf e Camping! Super Tag gsi und wieder simmer uf leere Strasse, sehr einsam durch Jungel ähnlichs Gebiet gfahre! I de nächste 2 täg werde mer de bim Fox- & Franz Josef Gletscher acho! 

Fox- & Franz Josef Glacier, 16.1.15

Es regnät und das wie us Chübu, darum hemmer ganz schnöu zäme gruumt und sind in es Kaffee ir nöchi go zmörgelä!
Trotz Regä hemmer entschiede zu de Gletscher z fahre, das i dere Gegend eh meistens Rägnet! 
Als ersts simmer zum Fox-Gletscher "klein aber fein" mer louft nid so lang und isch sehr nöch am Gletscher, gset aber nid so föu... Nachher simmer zum Franz-Josef-Gletscher, da louft mer fasch e Stund durch es langs Tal hindere und vo überau chöme Wasserfäu abe, ser idrücklich soföu Geröll und mer gset gut wie de Gletscher am schmöuze isch... de Gletscher selber isch grösser als bim Fox aber mer gses blaue Ice weniger gut, da mer witter weg isch... Es lohnt sich auso beides uf sini Art!
Denn simmer no um en "Lake Matheson" glofe, das isch en See bim Glescher aber isch nid e Gletschersee, sondern er isch zmitzt im Jungel. Sehr idrücklich gsi aui die Pflanze und das intensive grün! Tolle Weg haut ou aues sehr nass gsi! 😄

Mir hei üs mau wieder en richtige Camping gleistet um Kleder z wäsche, z dusche und uf nes richtigs WC z könne - dä Luxus! 😄 ah und nid vergässe mer hei endlich mau wieder internet! 😉
Go z Nacht esse simmer de is Dörfli (ja es isch ou sehr chli, es git da nur 1 Lade, 1 Tankstöu, 2 Souveniershops, 2 Restaurant ah und öppe 4 Touri-Infozenter, ja das wers de ou scho! 😄)
Isch en mega friedliche Abe gsi und mer heis gnosse nid z choche!

Morn geits no i die heisse Quelle go bade und de fahre mer de witter richtig Norde!

Urgestein vo me ne Städtli, 17.1.15

Nach eme zum Glück trochne Zmorge, hemmer no s Dörfli Franz-Josef besichtigt (aso die 2 Souvenierläde und die 3 Turireisebüro und 4 Restaurant) nachher hemmers üs i de Hotpools la gut ga! 
Nach em Mittag simmer de sogar bi Sunneschiin witter gfahre nach Hokitika, es wirklich chlises, härzigs und sehr altmodischs Städtli a de Westküste, aso grad am Meer! Das Samstig gsi isch het föu zue ga und es het sehr verschlafe gwirkt! En alte sehr fründliche Maa het üs den aber no es Glace verkouft, de Lade und de Maa hend üs beidi ser a Fridli de Schumacher erinneret! Es isch aso wirklich amüsant gsi! Das Dorf isch für e Jade Abbou und verarbeitig bekannt und überall hets Schmuckläde... Naja de Stei isch sehr schön, beidruckend grün aber haut doch nid so ganz mi Stil. Obwohl d Sonja härzigi Armbänder gfude het und so hemmer de doch no was us Jade postet! 
Aschliessend simmer witter i Norde gfahre, um wieder uf en DOC Camping go z schlafe! Mer hend ou extra eine usgläse, wo nid am ne Gwässer gsi isch und sind belohnt worde, es het endlich mau kei Sandfleuge ga! Obwohl üs Stich vo de Vortäg no recht plage, Mugge sind aso e Seich de gäge... 

Pancake-Rocks & Westküste, 18.1.15

Naja föu gschlafe hemmer nid entweder hets üs überau bisse oder es het so fesch grägnet, das zu lut gsi isch zum Schlafe! Defür hemmer am Morge wieder bi Sunneschiin und in kurz Hose chöne Zmörgele! Üsi Reis isch de witter richtig Norde nach Greymouth - die einzig grösser Stadt da im Weste, en Hafestadt. Das aber Sunntig isch, heit fasch aues zue ga und isch sehr usgstorbe gsi! Im grössere Zenter hemmer üs Nachschub vo Tigerbalsam (s einzige gloub wo gege  Sandfleuge-stich höuft) und Lebesmittu ghout und sie witter mit em Ziel zu de Pancake Rocks z fahre! Das sind Felse wo ebe usgsei wie en Bieg Pancakes, wöws so Steischicht für Steischicht isch, jedefalls sehr schön und idrücklich! Sowieso die ganz Strecki isch im Meer na (Tasman Sea) und es gset gigantisch us! S Merr isch da sehr wöud und überau hets Föuse und Klippe... Mer fahre nacher is Landesinneri, so das mer i de nächste 2 Täg Nelson (die Stadt ganz im Norde) erreiche, um no paar Täg im Abel Tasman Nationalpark z verbinge bevor üsi Fähri de am 28.1 geit... Jetzt simmer uf em DOC Camping bi Lyell! Das isch en alti Goldgräber Ortschaft und mir sie no 1h go loufe und hei d überreste vo dere Kolonie gse... 
Bald simmer sit 2 Wuche uterwegs, sit 11 Täg fahre mer mit em Büsli und hüt hemmer 2000 km Grenze "überfahre"! Die ganz Westküste wo mer i de legste paar Täg abgahre sie het mir persöndlich bis jetzt am beste gfäue, mega toll gsi! Jetzt bi ni gspannt uf e Norde vo de Südinsle mau luege was üs no erwartet!

Ah übrigens isch no lustig, überall hets Glei und immer muss mer wieder ufpasse bi Bahnübergäng ohni Schranke mer hei aber sit dene 2 Wuche nid ein einzige Zug oder Bahnhof gse! 

Und gut wirds in Neuseeland ersch am 10ni dunku, bis de simmer sicher immer uf eme Camping, denn üsi Autoliechter sind so mieserabel, das mer im dunkle gar nid chönnte fahre! Usegfunde hemmer das wöw mer dür en sehr fistere dundel hei müsse... Zum Glück hets bis jetzt nur 1 einzige Dunnel ga!

Fahrt zum Abel Tasman, 19.1.15

De Tiger Balsam höuft und mer hei e friedlichi ruhigi Nacht ga... Mir sie jetzt nach Motueka gfahre, die legst grösser Ortschaft vor em Natinalpark Abel Tasman, het sogar paar Läde und härzigi Restaurantli... Nach em Umebumle, Wucheichouf und em Zmittag simmer is Reisebüro um üs z berate la, was mer im Abel Tasman so aues cha mache... De ganz Nationalpark isch nur zu Fuss oder ebe uf em Wasser erreichbar und da mer kes Zelt hend, hei mer nid so gwüsst wie mache... Jetzt hemmer en 2-Tages-Kayak-Tour bucht wo mer im ne Boot-Hostel chönd schlafe! Mir freue üs echt u druf!
Nachher simmer uf Marahau gfahre, die auer legst befahrbar Ortschaft vor em Park! Es isch so schön! Richtig sunnig & warm und so es staublaus Meer - de wahnsinn! D Ortschaft isch chli, paar Hüsli, 2 Cafe, es Turicenter und 3 Campings und das wers ou scho... Üse Camping isch u hübsch - Barns! Kostest haut chli meh (22.- pro Nacht pro Person) aber Meersicht, ke Sandfleuge, Duschene und richtigi Wc und sogar Strom - wow dä Luxus 😉😄
Da werde mer die nächste paar Täg gern verbringe!

Kayake & wanderä & sunnelä 20.1-22.1.15

6:30 geit de Wecker, Zmorgä Esse, icreme (es isch ja endlich heiss und schön) und Rucksack packe - Startklar am 8i isch bim Touri-Zentrum Treffpunkt. Mer bechöme en Schwümmweste und nach chli umsteah geit üse 2-Tages-Tripp endlich los! Mir freue üs mega und es isch echt u schön i dem Nationalpark, s Meer isch so türkis, eifach geil!
Als ersts fahre mer mit Wassertaxi i Norde vom Park, 20 Minute. Und denn geits los mit Kayake, ja bi Gegewend und Wäue isch das sehr streng, vorrallem simmers die einzige gsi wo ke Maa als verstärkig im Kayak ga hend aber ou d Sonja und ich hei die knapp 4h gschafft! Nebst em strenge ischs ou eifach de hammer gsi! Die Buchte und Inseli wo mer gse hei, das blaue Wasser, d Seeleue und de Lunch am ne verlassne Strand! Meega cool! Mir sie aso vo Bucht zu Bucht kayakt, bis mer den i einere acho sie, de Anchorage wo üsi übernachtigs-möglickeit gankeret ga het!

Denn ischs witter gange ufs Backpacker-Boot wo mer ebe werde druf schlafe! Ok ich ha ja eigentlich ke Platzangst aber wo ni die Leitere ha müsse abeklättere, zu dene sehr enge Rüm mit dene sehr enge Bett und das no Schwankend, isch mer scho recht komisch vorcho! Aber besser als erwartet hemmer de sogar recht gut gschlafe! Mer isch sogar eher bim Kayake vom Gschouku schlecht worde als uf dem Boot. 
Mer hei es feins BBQ zum Znacht becho und hei ganz föu Lüt könne glert und föu föu englisch gredt! Het paar ganz spezielli Dütschi, netti Australier und Schotte und ganz en cooli Frau us Israel... Isch no interessant, aso die Iheimische (neuseeländer und ou d australier) verstah ni aso nur mit sehr föu konzentration und müh ah und rate wad meinet 😄 de Dialekt hets echt in sich und vorallem ou no das genuschel vo dene...😉 Aber süsch ha ni echt freud, grad Turia vo Amerika oder ebe ou mit ihre vo Israel ha ni die ganz Wanderig chönne chli schnore und ha se u gut verstande - mega cool!

Am nächste Morge es churzes Zmorge und de simmer wieder a Land bracht worde - ja jetzt schwankt ou de Bode e chli... Barat für de 4h marsch wieder retour zur Usgangsbucht, wo mer gester mit em Wassertaxi gstartet sind, laufe mer los! Mit paarne wo mer uf em Boot könne glert hei, geits gmütlich zrugg! Isch meh en Spaziergang als en Hike, aber so für 4h grad perfekt! Mer wanderet alles im Meer na, vo Bucht zu Bucht und immer schön im grüne am Schatte! Mer hei de natürlich ou en längeri Badepouse igleit! 😍
S Meer isch aso scho einiges chöuter als in Hawaii, aber als erfrüschig nach em Wandere herrlich!

Am abe simmer de wieder uf e Barns Camping und hei gmütlich üs was kochet! Hammer erlebniss gsi!

- 3 Täg Campe in Marahau
- 4h Kayakt vo Onetahuti Bay - Anchorage Bay
- übernachtet uf em Boot i de Anchorage Bay
- 4h gwanderet vo Anchorage Bay nach Marahau
- 4h gwanderet vo Bark Bay nach Anchorage
- 6h gwanderet vo Totaranui nach Wainui und zrugg nach Totaranui (Rundreis z oberst uf de Karte)

Legsti Wanderig und jetzt no 2 Täg Strand, 23.1.15

Leider mümer üse schön gmütlich Camping in Marahau verlah... Mer sie no einisch Wassertaxi gfahre, um no en anderi Streck go z wandere, ou die isch de hammer gsi! Ou ca 4h vo Bucht zu Bucht... Aber jetzt wemmer no i Norde vom Park um det obe no chli z wandere, da die im Reisezenter gmeint het, sig e super schöni Rundwanderig!

Puh ja super schön isch gsi, aber es isch en 6h e Wanderig gsi und mir sie durend ganz id Buchte abe und de wieder uf 200 m.ü.M. und de wieder Abe und am Schluss no uf 400 m.ü.M ue! Aso am Schluss simmer fix und fertig is Meer gumpet! 
Da de DOC Camping im Abel Tasman immer voll isch und ou ganzi 15 Doller pro Nacht pro Person kostet (und het ja nur wcs u kalt Duschene) simmer wieder retour gfahre us dere Bucht, nach Pohara in en "richtige" Camping ou grad am Meer (kostet 22.- pro Person/pro Nacht aber ebe mit Sanitär Alage und Strom!) komisch isch zwar, dass zum Dusche no musch Münz abe la, aber egal...

Da üs jetzt eh alles weg tut und mer überau Blatere hei mache mer morn en Meer & Strand Tag! Und de übermorn geits nach Nelson und denn am Diestig scho ufd Fähri zur Nordinsle... 😄

Büchse Mais & Linksverkehr ☺️

In Marahau gits ebe ke Lade und da mer nid genau plant ga hend, grad 4 Täg z blibe hemmer chli knapp ikouft ga... Aso emu vorauem fürs Picknick 😄 mer hei de denkt ok mache mer eifach Teigwaresalat da hemmer alles! Im Campinglädeli vore hets no paar Büchse-Sache wo mer cha choufe, de hemmer no Mais gfunde - tiptop! Tja en Büchs sött mer de no chönne uftue - mer hei sogar im Büssli en öffner abet dä isch so us em vorlegste Jahrhundert, dass ichs demit echt nid ufbracht ha... Tja ok für öppis het mer ja netti Camping Nachbere 😄 Ich schön go fräge und lug ou da, sie hei eine de bi und de no e super guete u neue!!! 
Ich fah a, wot die Büchs endlich öffne, da bricht de Teil zum dreihe ab... 😁
Mit ganz föu Sorrys bi ni de haut de wieder go zrugg bringe. Sie heiss eher lustig gfunde (ich gar nid!) Und scho uf em Rückweg rüft de Maa no, ob de Büchs offe sig? Hihi ich nei no nid... Er het sie mir de mit Zange usw. uftah und was isch dinne - es Mues! Das isch Stückli Mais gsi mit sonete grusige Creme... Grusig und unbruchbar für Salat- tja schlussendlich nach au dem isch Büchs mit Inhalt im Güsu glandet! ☺️

Retour vo üsem 2-Tages-Trip und doch recht müd, fahr ich mit em Büsli vom Parkplatz und fräge so d Sonja, öb i grad hinder mir eine ha oder ob i cha langsam fahre (um was gnauer azluege)...
D Sonja meint de arschcool und im volle Ernst: Ja es chiem eine aber de fahr uf de fausche Site! 
Haha ja es het de u mega schnöu Klick gmacht, dass ich falsch fahre und natürlich nid de ander!!!! 🙈
Ja süsch fahre mer aber immer richtig, nur so zur Beruhigig! 
Was eher no git isch das i de Schiebewüscher ala anstell vo Blinke - isch ja ou e Quatsch das verkehrt ume z mache!!!! 😄😄

Nelson - Picton - Wellington, 27.1.15

Nach eme ganze Tag ihr Sunne und am Meer (zum üs Erhole vo dere wahnsinns Wanderig, ja de Weg vom Platz as Meer isch für üs scho streng gsi & ersch für üsi arme Füss!) hemmer de zäme Packt und sind am Sunntig Namittag uf Nelson gfahre! 
Nid en spezielli Stadt aber doch härzig und mit paar tolle Läde! Überrasch das was offe het, hemmer de ou grad chli gshoppet... Paar kurzhose, shirts, e täsche usw. 😄 Nach eme feine Zmittag hemmer üs de am Nami en DOC gsucht uf de Strecki nach Picton.
De DOC isch ganz ok gsi eifach ungloublich chli und dadurch alles sehr eng und lut... Mir sie aso am Mäntg gli uf und uf Picton! 
En richtig süsses Hafestädtli, üs ischs chli vor cho wie im Tessin... Wucheichouf, Karte schriebe, feine Fisch esse und sünnele das isch üses Tagesprogramm gsi! De Nami hemmer mit gniesse, läse und no meh Sunne uf em DOC verbracht! 

Und isch de "grossi" Tag gsi 😉 und mer sind uf d Fähri - Ziel Wellington Nordinsel! 
D Fahrt isch schön gsi aber recht läng (mit ichecke vom 13.00 bis wieder drab 16.30) und het üs müs gmacht... Wow Wellington isch en Stadt, sit 4 Wuche gsämmer mau wieder Wolkekratzer, Schnöustrass und stöi sogar chli im Stou... Chunt eim richtig komisch vor! 😁😄
Morn wette mer no chli Wellington aluege und denn geit des Abentür Nordinsle los! Planig findet hüt abe no statt! 😄😉

Ah und übrigens d Eliane & ihri Familie (mini Tante) isch sit hüt jetzt ou gut in Christchurch acho! Soo cool! Wünsche guti Fahrt und föu Spass! 😘

Wellington & einsame Camping, 28.1.15

Wellington isch en grossi schöni Stadt! Es isch die 2. grössti Stadt in Neuseeland nach Auckland und het 200'000 Iwohner! Als erst hemmer mau wieder fürs Parkiere müsse zahle, ganz was ungwohnts! 😉
Nachher simmer is Te Papa Museum, mega spannend, sehr neu und schön gmacht! Es isch es National Museum und het alles über Gschicht, Maori, Tier- und Pflanzewelt, Bevölkerig usw. vo Neuseeland! Es het ou es "Marae" es nahbouts Versammligshus vo de Maori, sehr spannend gsi - vorallem für üs zwöi wo gern Gschicht hei! ☺️
In Wellington hemmer no chli gshoppt, de Hafe und d Sonne gnosse! 
Denn simmer witter richtig Napir ad Ostküste und i de Mitti wieder uf en DOC!

Es isch en chline, usnahmswis gratis Camping gsi mit eme Plumsklo und ja das wers... S Witzigste dra, mer sind elei gsi! Hei aso nid schlecht gstunt, denke das werde mer kes 2. mau erlebe! Mer hei aso gaaaanz frei Platzuswahl ga! 😜

Nach em Esse hemmer üs uf e friedliche Abe (und gli is Bett) igstöut ga! Hei aber de spontan Bsuch becho, vo paar Nachbare us de Gegend, da die so überrascht gsi sind, dass uf dem Camping Lüt het... 😄 De Nathan, sie Kolleg und no es Päärli hei de Bier organisiert und mer hei e sehr lustige Abe ga! De Nathan het sich de ou sehr müh gä mit üs z rede, denn wenn die Kollege unterenand gredt hei, hemmer eifach gar nüd meh verstande! Kiwis (Neuseeländer) verschlücke aui Konsonante und binde so Wörter und sie hei luter SlangUsdrück (dialekt)... Unmöglich zum verstah und sie heis lustig gfunde!
Mit de Ziit simmer de druf cho, das de Nathan uf de Farm vo de Eltere läbt (en mittu mässig grossi Farm) mit 750 Küh! Ja ich ha de gmeint, d' Sonja chiem ou vonnere "Farm" und er: Wie föu Küh de? Und sie so ja 14... Ja de isch mau e Rundi glachet worde 😂 
Mer hei de ou no döffe de Hof go besichtige und sini persöndlich Oldtimer Sammlig, was wirklich (sogar für üs Froue) sehr beideucked gsi isch!

Alles in allem en sehr unerwartete super lustige Abe mit Locals gsi! 😄😉

Napier - Art Deco Städtli, 29.1.15

Es schöns sunnigs Städtli direkt am Meer, jetzt sit langem mau wieder am Pazifik und nümme ar Tasman-See! S Art-Deco Städtli het föu härzigi, bunti Hüser, föu schöni Strassekaffee und überau hets Palme! Nach em Shoppe und eme feine Zmittg, e riese Salat mit luter komishe Salatblätter (aber ou sehr fein), simmer i 30 Min. no uf e "Bluff Hill" Ussichtspunkt ue maschiert, vorbie a föu Villas und schöne Strässlu!
D Ussicht isch grandios gsi, quer über die ganz Stadt - föu blauem Meer und em Hafe inklusiv Sägewerk! 
Gstärkt mit Frabuccino und Icekaffee vo üsem gliebtä Starbucks simmer witter gfahre, wieder uf ne DOC. Nach chli Suche hemmer ne ou gfunde, wunderschön glege am ne Fluss und scho recht nöch vom Morgigä Ziel Taupo!

Taupo - Wasserfau & Mount-crack - Vulkan 😄 30.1 & 31.1.15

Als ersts simmer is Tourizenter üs go informiere was mer gnau so cha mache und hei üs entschide die gross Vulkanwanderig - Tongario Alpin Crossing 7-8h z mache und hei de Transport defür grad bucht!
Als nächsts isch en chlini Rundeanderig bi de "Hakka Falls" agseit gsi! Mir sie 2h im Fluss nah und hei det ou s erste mau en "heisse-Bach" gse... Det isch e Bach mit sehr warmen Wasser i dä gross Fluss i gflosse und jensti Lüt hei die warmi Quelle zum bade gnützt!
De Wasserfau isch nid bsunders gross gsi aber het en ungloublichi Mengi a Wasser ga und isch staublau gsi - also doch sehr faszinierend! 😄

Spotan simmer de no eme andere Wegwiser gfolgt zu de "Moon Cratier Park" und es het sich glohnt!
En 45 min. Rundgang zeigt eim die Löcher wo dampfe, rüche und teilw. ou stinke 😉 De ganz Bode dampft und mer merkt ou das es überau sehr warm isch! Die Löcher sind ou extrem farbig, die Erde glüht rot & orange... Het üs sehr beidruckt und ou gfaue! 

Gege Abe simmer de wieder losgfahre im "Lake Taupo" entlang nach Turangi. Mer hei uf e DOC wöwe wo möglichst nöch isch vom Parkplatz, wo morn üsi Wanderig wird starte... D Suchi nach em Camping isch mau lustig und aspruchsvoll gsi aber mer hei ou dä erfolgrich gfunde!

Tongario Alpin Crossing

5:45 Uhr Tagwach!
Leider bi Rege hemmer müsse ufstah, hei aber hoffnig uf besserig ga 😄😄
Zmorgä esse, Rucksackpacke und los geits... Üses Büsli wird perfekt Sitwärts iparkiert 😉 uf em grosse Parkplatz (wo üses Ziel wird si). 
Denn geits mit eme uralte Schoubus zum Startpunkt! 
Auso es isch Neblig, het aber ghört Rägne zum Glück! Nach em erste Iloufe, geits de ou so richtig ue uf e 1. Vulkan, nachere kurze Erholig, geits de grad nomau meh ue und de so richtig! Das wer ou scho de 2. Vulkan und höchsti Punkt vo üsere Wanderig 1890 m.ü.M (gstartet bi 1200).
Nach ere kurze erholigs / Mittagspouse geits ene wieder abe und zwar so gäch wis vorher ue isch. S abloufe isch nid grad eifach, das ke Weg het sondern nur rütschende Vulkansand... Sehr es witzigs und astrengds aberütsche und ou guts Peeling für üsi Füss!
D Landschaft isch allg. sehr karg, überall hets schwarzi Vulkanstein und ab und zue gsprürt mer Hitz us em Bode stiege!
D Vulkanspitze hemmer aber leider nid gse, das zu föu Nebu ga het! 
Ou jetzt simmer bim Blue-Lake acho, en 40 Grad See, klar blau und bi besser Wetter sicher sehr fasziniered... so naja mer hei ne emu grad so erkönne chönne!
Nach wittere 2.5h abeloufe simmer zu nere abgfackte chline aute Hüte cho, üsi Mittagspouse - de Witz dra vor dere Hüte hets es Schöud ga, dass mer sich innere Vulkangfahrezone befindet und kei Pouse söug mache! Da das aber offiziell e Hüte mit WC und so gsi isch undföu anderne Lüt hemmer de glich det was gässe! 
Nach wittere 1.5h abeloufe hemmers de ou scho gschafft und sind ou recht überrascht gsi, dass mer nur 5.5h ga hend und nid wie iplant 7 oder 8! 
Mir sie aso stolz gsi 😜 und de Witz dra, die legst unplant gross Wanderig isch strener und länger gsi (über 6h)! 😄
Ja d'Wanderig wer bi besser Wetter sicher spektakulärer gsi aber ou föu strenger, das gar nienä Schattä ga hät! 
De Abe hemmer de uf eme sehr chline, sehr friedliche Camping am See verbracht! 😄

Unterbruch mit Schwiergkeite, 1.2.15

De Sunntigmorgä het ser friedlich gstartet, mit sind is "Orakei Korako" das isch en Vulkan & Gesyier Park und isch u mega faszinierend gsi!
Alles het gsprudlet und kochet, gspuckt und gstunke, aues het glüchtet und i verschiednä Farbä gschimmerät! Mer hei ous erst mau s Nationalsymbol
Vo de Neuseeländer gse, nei das isch nid wie vermuetet de Kiwi Vogel - dä gset mer nämmli nie, sodern s'Söuberfarn! das isch vo e grossi grüni Farnpalme und d under Site vo de Blätter schimmeret söubrig. D Sonja het alles gä und jedes Blatt treit, bis mer de endlich das Farm gfunde hei 😂

Nächste Ziel d'Stadt Rotorua und ja s Unglück faht a... Ja ihr könnit ja das Gschichtli scho, vo üsem arme Büsli... De Namitag hemmer de mit Polizeigspräch, telefoniere mit ganz föu Kompanie (Sonja het sich da ou trotz dem schwierige Kiwi-Slang sehr gut gschlage!) und Hostel suchi verbracht! Ja mer hei ou scho gmütlicheri Äbe ga aber die Lüt im Hostel sind mega Lieb gsi und de Wirt het sogar e Chuchä für üs bache!

Maori-Dorf Mitei 😍 und wieder ready! 2.2.15

Nach witterem umetelefoniere und föu warte isch de endlich de Alain - üse Retter, vo Rotorua Autoschiebe-Service cho und het üses Büsli mit gno! Nach ungloublich churze 40 Min. hemmer üses Büsli gflickt und frei vo Glasschärbe wieder zrugg becho! 🌟😍🌟👏

Üs Ware (in Plasticksäck - het super usgse, chli was vo homeless ga!😄) hemmer de wieder verstöut und hei üs ready zum shoppe gmacht! S Meiste hemmer ou wieder gfunde und ich bi happy gsi, wo nis Natel wieder ha chönne Lade und mis Linsemittu wieder ga ha! Nur das mit neue Koffere schiebe mer no chli use! Isch richig schön, soo föu freie Platz im Büsli z ha 😉

Doch jetzt chli erschöpft simmer uf e nächst Camping, per Zuefall het dä zu üsere Freud en eigeti Thermalquelle ga und 2 Wellnesspools, wo mer üs de tiptop hei chönne entspanne! ☺️

Mitai Maori-Show isch am Abe no uf üsem Plan gstande, das hemmer nämmli scho bucht ga, bevor de Ärger agfange a het... Am 6i simmer de Abghout worde und sind spannt und vouer Vorfreud gsi was üs so wird erwarte!
En Show mit föu Musig & Tanz, es mega feins traditionells Essä, humorvolli Moderation & zum Schluss hemmer ou no Glühwürmli und en sprudelnde See gse! Aso en glungne und lustie Abe gsi!

Redwood forest & mau wieder chli fahre, 3.2.15

Endlich geits wieder witter mit em Büsli und üse ersti Stopp isch im "Redwood Forest" gsi. Das isch en Nationalpark (Waud) mit ganz föu Kauri-Böim! Die Böim sind riiiiiesig und hei en wahnsinns Umfang! Und d Rinde ish chlie Stoff so weich und faserig...
Nach eme 1h Spaziergang simmer de witter gfahre mit em Ziel zu de Coromandel-Halbinsle z cho! 

Acho in Thames hemmer üs chli über Gegend informiert und sind de uf en DOC. Die nächste 4-6 Täg wette mer chli am Meer verbinge, hoffe nur no uf Wetterbesserig!
Für en churze Schwumm im erstundlich warme Fluss hei aber die wenige Sunnestrahle ou glänget!
So und jetzt mau wieder en friedliche Campingabe!

Und süsch no so...

Isch immer wieder lustig & mer fröie üs ou immer sehr ab Neuigkeite us de Schwiiz, unterhaltsam gschriebne Infos und allgemeine Meinige zu üsere Reis -gschriee vom Thömi (chlinä Brüder vo de Sonja!) Dank sinne Kommentär chömmer sogar über üses Usroube-Pech lache! Auso merci und freue üs ab wittere Infos! 😄😉

Danke ou a Rest (mini Family) wo grad ghöufe het alles organisiere mit Bank und Versicherige usw. üs geis auso tiptop und mer gniesse s Reise scho wieder totau! ☺️

Bi Räge chli Autofahre, 4.2.15

Wemmer ke Spieli, ke (dütschi) Bücher, kes Natel (mit Spieli) und ke iPod meh het isch das mit em schlechte Wetter so e Sach... Zum Glück gits Kaffee und d Sonja und ich wüsse ou nach 7 Wuche no was z rede! Isch aso doch nid so schlimm! 😄 Und Stadt-Land-Fluss chammer ja selber mache und ou stundelang spiele 😄

Mir sind nämmli hüt die ganz Halbinsle abgfahre, hei i de Ortschaft Coromandel was feins zmittag gässe (bi fasch Sunne) und sind de no witter i Norde uf en DOC - er würd troumhaft am Meer liege aber ebe es Rägnet und wott gar nümme höre... Am morgä hemmer churz chli as Meer chönne - eifach herrlich! Riese Strand und leer... Aber ebe da er no de ganz Tag Rege gmeldet het, hei mer entschide witter z fahre, das mer chli nöcher vom ne "Städtli" wäre oder so...

Otama Beach Camping 4.2 - 6.2.15

Mer hei für üs de perfekt Camping gfunde, kostet nur 12 Dollar pro Person/pro Nacht, isch härzig (ja het fasch nüd aber immerhin Wasser und es Klo) und isch direkt am Meer! Und zwar nid am ne Sunneschirm-Strand sondern mir sie gaaanz elei!
Ja s Wetter ish nid so toll (es wiindet ungloublich fesch) aber mir sitze glich am Meer und sind sogar ganz churz i de Wäue inne gsi go bade... 
S Nacht hemmer de müsse im Büssli inne (alles zue) choche süsch hets üs s Gas immer usblase!

De Tag druf hets zwar immer no fesch gwindet aber d Sunne het gschinne und mer hei en richtig herrliche Strandtag gmacht! 😍 D'Sonja het sich aber no nid ganz mit de Wassertemperatur chönne afründe aber es besteit no hoffnig 😉

Mir hei aso 2 schöni und sehr windigi, teilwis nassi Täg im sehr sehr schöne Nirgendwo verbracht! Obwohl es het sogar es Lädeli ga (s einzige in 40km Umkreis), aso ja es isch eifach en alte Wohnwage gsi, wo mer het chönne Möuch, Käs, Brot und Eier usw. poste... Nur d'Öffnugsziite sind nid so bekannt gsi, das isch so en überraschigs-sach gsi!  😄
Üsi Tour bis jetzt uf de Nordinsle!
Üsi Tour bis jetzt uf de Nordinsle!

Whitianga & Hahei ... 7.2. - 9.2.15

Whitianga isch en sehr Touri-orientiers-Städtli mit mäsig schöne Stränd aber ungloublich föune Agebot... üs hets aber nid so passt dert u die drum hemmer nur ikouft und sid witter gfahre nach Hahei... 
Hahei isch es ganz es chlises Dörfli, wo eigentlich nur us em Camping, paar Restaurant, em Strand und Villene besteit 😄 aber glich mega härzig, aso üs gfaut! 

Da simmer paar Täg uf em gliche Camping, direkt am Meer so schön am Sunne & Hitz gniesse! 😍 
Am Abe am Badmington spiele (ja es windet mau nümme so) und glichs nüd mache am gniesse! 

Nach 2 Strandtäg hemmer de doch mau wieder was wöwe mache und sind go "wandere" (3h hi und retour lut Wegwieser, ga hemmer 1.5h). S'Ziel vo dem Spaziergang  isch "Cathedral Cove" gse en usghölte Fels, wo mer bi Ebbe cha düre loufe! Die wo d'Föum Narnia gse hei, könne die Höli ou... Es isch schön gsi aber nid de wahnsinn aber chli loufe het ou gut da... 😄

No 9 Täg - 10.2.15

So zum legste mau simmer ufbroche, um e längeri Strecki z fahre. Es regnet oder isch bewölkt aso en ideale Tag zum chli Autofahre... Mer hei no nid ganz entschiedie wie witt, s Ziel klar mer möchte nach Whangerei (Stadt nördlich vo Auckland) aber ob mer das alles i 1 Tag fahre luege mer spontan...

Das aber eh wüst gsi isch, hemmer entschiedi düre z fahre nach 4.5h simmer de uf em DOC grad underhalb vo Whangarei acho... 
Um nid nur gfahre z sie, hemmer trotz Wind und chöuti (ja üs ishs cheibe chaut vor cho - ich weiss es het ke Schnee d!) no en länge Strandspaziergang gmacht ud üs de doch chli is Büsli ie zrugg zoge!

Zitt vergeit scho schnöu und i 9 Täg flüge mer de scho retour! Jetzt no paar Täg am Meer, no paar Souvenier bsorge 😉 und es Hostel mümmer no buche für in Auckland und das wers de... 

Whangarei & Pahia 10.2 - 14.2.15

Nach eme Tag shopping (mer hei jetzt de aues Souvenier, Nackeküssi & Köpfhörer zum Flüge...) und friedlichem am Hafe Kaffee trinke, hei mer üs wieder zu emene abglägne DOC am Meer ufgmacht... Leider isch immer no totau bewöukt und es windet ungloublich! De Camping wer wieder wunderschön gläge annere Bucht aber es windet üs eifach zu fesch... Nach em Koche im Büsli und föu heissen Kaffee verchrüche mer üs under de Bettdechi... 

Mir fahre jetzt doch nochli Nördlicher (s Wetter isch zu schlecht für en Strandtag) nach Pahia, das isch es chlises Hafestädtli i de "Bay of Island". Da hemmer en eifach, böuig Camping ganz zentral Gläge gfunde...
Er isch fou schrege, lustige & nette junge Lüt. Paar lebe da in Zäut für paar Mönet und schaffe ou da anderi wohne im Campinghüsli selber und eine schlaft im Zäut obwohl er ke Matte und ke Schlafsack het... Ja ebe lustigi Lüt aber ou sehr friedlich! Da blibe mer mau wieder chli...

Hüt, Fritig de 13. hemmer en Bootstour gmacht, um die Bay chli z gse und natürlich um Delfine z gse... Mhh isch toll gsi! 😍 Sind eifach u schöni Tier! Mer hei se spiele und springe gse, de hammer gsi!
Ou s Wetter spöut wieder chli mit und Sunne chunnt immer mau wieder und mer chöi ou wieder in kurze Hose ume laufe... 

Jetzt blibe mer no bis morn da, mache üs e schöne Abe im Städtli mit Meeresfrücht 😋 oder Burger und morn fahre mer de wieder richtig Süde nach Auckland! 
Evtl no mit eme Tag Pouse aber sicher am Mäntigabe werde mer in Auckland sie um am Di üses Büsli abzgä! 😢 S'Hostel hemmer ou bucht, chunt aso gut! 

Ich verrate jetzt nid wer aber de einti Teil vo üs 2ne freut sich doch sehr ufs heiga 😉 de ander naja... A die andurendi Wärmi da, chönt mi scho für immer gwöhne! 😍

Back to Auckland! 😢 14.2. - 15.2.15

D Sonne schiint und mer gniesse no so richtig! Mir sind nach Whangarei retour gfahre und hei en u chline, mega härzige Camping gfunde, de Campingplatz isch uf ere chline halbinsle gsi - mir elei und rundume Meer 😍 perfekt! Mer hei aso de ganz Tag gsünelet unds eifach gnosse!

Am nächste Morgä (ja es sind jetzt no 5 Täg) simmer zu de Abbey Caves gfahre - das sind 3 Höhle wo mer cha ie klättere! Sie sind riesig und es het u spass gmacht, i die dunkle länge Hôhlene z klettere... Wit inne, ganz im dunkle hets den ou ganz föu tolli Glüwührmli ga 😍 mega cool! Es het ou fasch ke Lüt a, was das ganze no friedlicher gmacht het. 
Nachher simmer no zu de Wasserfäu und go spaziere, dür e Waud mit Kauriböim... 
Nach ere Stärkig vo "Fish & Chips" hemmer üs wieder en schöne Camping gsucht um üse 2. legsti Abe "mit em Büsli" z verbinge... 😄

Legstä Camping 16.2.15

Mer hei scho wieder Glück und werde vo Sunne gweckt und es isch stau blaue Himmu 😍
Spontan entscheide mer no en 3h Klippewanderig im Meer nah z mache! Super Entscheidig gsi, es isch ungloublich schön und ghört neb paar andere Erlebniss zu minne Highlights vo Neuseeland! Die Wöudniss, die Föuse und das stau blaue Meer... 😍 Die Wanderig chammer nur bi Low-tide (Ebbe) mache, da mer am Afang und Schluss im Strand (im Sand) nah muss und bi Flut hets ke Strand meh... Mer hei auso Glück ga und grad die passend Ziit verwütscht! D Wanderig isch rect sträng gsi, da mer sehr oft föu Stäge ue und denn wieder abe und wieder ue si, aber ebe mir sid ja fit! 😄

Nachher simmer uf Orewa gfahre, die legst Ortschaft vor Auckland und ei üs en legste schöne Camping (am Meer natürlich) gsucht!
Es regnet jetzt zwar chli aber da dä Camping en schöne Ufenthaltsrum het, isch üs das glich!
Mer mache üs auso en legste gmütliche Campingabe!

Am Morge schiint scho wieder d Sunne und es isch heiss - mer hei auso Glück! Nach eme legste Zmorge i üsne Campingstühl und mit Sonnebröue u Müsli geits as Packe... Alles usrume, ipcake, use putze und wegwerffe was nümme chash bruche! 
Mir sie speditiv und nach 1h geits scho los, üsi auer auer legst Büslifahrt 😢 ab nach Auckland City! 
Üsi ganzi Route... 😄
Üsi ganzi Route... 😄

Auckland & es richtigs Bett ☺️ 17.2.15

Üsi fahrt uf Auckland isch dank Navi (scho was tolls 😉) ohni Verfahre glunge und üses Büsli hemmer ou ohni Problem chönne abgä! Ou das mit de Glasschiebe isch kes Thema meh gsi... Üsi Hostel Buechig het ou klappt und d Sunne schiint no immer! So wit also alles perfekt, wet das nid scho de Abschluss vom Reise ... ☺️

Auckland isch en grossi Multikulti Stadt und mer cha gut shoppe 😉 Zum Glück ischs Hostel ou ganz zentral gläge und mer chöi sofort loslege... Überau Läde, herzigi Caffes und en schöne Hafe - perfekt um die legste 2 Täg no z gniesse!

Mir hei aui Souvenier, alles zum
flüge (ich ha wieder Kopfhörer und Nackeküssi und d Sonja wieder es warms Jäggli!) und süsch wemmer nid Shoppe sitze mer mit Icekaffe am Hafe und gniesse d Wärmi...
Schlafe so im ne richtige Bett isch ou was tolls, nur d Lutstärki vonere Stadt simmer üs nümme so gwöhnt! Zum Zmorge gits jetzt ou nümm nur Müsli und Tost sonder Pancakes und Egg Benedict 😄😉

Auso alles in allem e super Abschluss wo mer mit Rose und Calamari-Ringli ou so richtig gnosse hei! 😍

Abflug: Auckland - Melbourne - Dubai, 19.2.15

So alles isch packt, Koffer jetzt ou scho ufgä und mir icheckt... Es sött auso gut cho und ja mir sind jetzt scho warm agleit und hoffe verfrühre so bim acho nid 😉

Abflug isch in Auckland am 18.50 Uhr, den in 3h nach Melbourn und denn witteri 18h nach Dubai und denn no 6h nach Züri... Mir sind aso am Fritig Mittag 12.20 Uhr hoffentlich mit Koffer in Züri 😄
Und ja öpper vo üs zwöi ish ou scho chli nervös und vorauem voller vorfreud... Ja de ander Teil wer gern no churz uf d Fidschis oder so aber da ich ja jetzt eh scho am Flughafe hocke, freu mi doch ou uf hei 😄😉

Auso bis bald 😘

Rückblick 😄 nach 3870 km

Neuseeland isch es tolls Land und mer cha wirklich föu mache! Mir heis aso zäme super ga und immer föu Spass, egal ob mer mau wieder irgendwo im niergendwo campt hei oder grad Stunde uf ere einsame Strass gfahre sind oder irgend in en Hoger ue klätteret usw.
Es het sich ou schnöu ergä, das mer es super Team sind wenn d Sonja fahrt und ich säge wo düre 😉 alles andere isch eher chaotish gsi - mer hei üs auso super Ergänzt!

Üses Büsli isch ja wirklich scho recht alt gsi und paar Sace hei nümme so klappet aber mir hei s Lustig ga mit ehm! 
Und es het ja ou nie es wirklichs Problem gä, höchstens mau klemendi Türi, zufesch kochende Gaskocher, en durchhängende Tisch usw. 😄

Das mit em Ibruch isch doof gsi aber het üs nid grösser beirrt und mir sie ohni lang müsse warte wieder witter greist... 
Mer hei ou föu lustigi, netti aber doch ou föu komischi Lüt könne glehrt! Vorallem Dütschi hets ja da ou überau und ja es sind teilwis scho sehr unterhaltsami Lüt!😉

Highlights sind no schwierig so ufzliste... Mir het de Nationalpark "Abel Tasman" sehr gfaue, wo mer Kayakt und gwanderet sind. Denn d Vulkanpärk und Gesyier in "Taupo & Rotorua" sind beidruckend gsi... "Coromandel-Halbinsle" wo mer gsünnelet hei und de Schluss ou "Bay of Island" mit dene wöude Klippene... Allgemein aui üsi Wanderige hemmer super gfaue! Eher wenier beidruckend ha ich "Milford Sound" das Fijor gfunde, wo eigentlich so beidrucken hät söue sie...
Städt hets paar schöni da aber nid so beidruckent toll, dass mer föu Ziit für Sightseeingtour brücht!

DOCs üsi lieblings Camping hend ou für paar Lacher gsorgt, bis mer die aube gfunde hei und de mängisch ischs so gar nüd gsi und anderi mau wunderschön glägni tolli Campingplätz... 
Ja uf de Südinsle sind toll gsi, egal was so ga hes a Infrastruktur mer het 6 Doller pro Person pro Nacht zaht. Uf de Nordinsle hends üs de nümme so passt, of sind doof Gläge gsi und immer wieder hemmer müsse 10 oder 15 pro Person pro Nacht zahle, obwohl sie ou nüd meh ga hend als es Plumsklo 😄 komisch gsi...

Föu säge ja ihne heig d Südinsle föu besser gfaue und sig föu spannender usw. Mir chöi das wirklich nid säge... Ja die endlose Streckene uf de Südinsle und die extremi Wüwdniss isch toll, sehr beidruckend und wirklich nur uf de Südinsle vorhade! Aber d Vulkän, die heisswasser Quelle, s wärmere Meer, Klippene, Maori Dörfer und viele schöne Städtli, sowie s warmere Wetter (föu Sunne) macht für üs d Nordinsle genau so spannend und toll! Mer muss haut wirklich eifach beides gse ha! 😄

So zum Schluss no es Dankä a euch, mega cool gsi heit ihr immer mau wieder de Blog gläse und mer hei üs ou immer ab Kommentär gfreut! 
Dir Eliane, Ueli, Florin & Yaron no ganz föu Spass, super gsi mit euch im gliche Land ume z Reise 😄 bis gli und gniessets no!

So jetzt stiege mer is Flugzüg und mer gseht sich ir Schwiiz! 😘