Hawaii, 26.9.14 um 23.13

So mir sind acho! 😄 Nach reiner Flugziit vo 17h und 12h ziitverschiebig simmer scho recht tot... Aber alles het bis jetzt klappt und mer hend ou üsi Koffer grad becho! 😄
Üses neue dehei hemmer ou gfunde, es isch recht chli aber tiptop! 
Mau uspacke und de schlaaafe und waagrechter haltig! 😄

Abflug Zürich - 26.9.14  um 11.55 Uhr

1. Tag, 27.9.14 um 20.30

Priscilla (üsi Vermiterin) het ja gmeint es sig momentan recht wüäst und chalt... Falls mir also no en Decki brüchte - nur melde! Es sind aber sicher Gfühlte 30 Grad :) simmer mal gspannt, wis wird, wenn d Hawaiianer ou warm hend! :)

Üses Zimmer isch chli aber ganz ok! Für das wo mers bruche längets! Und falls mer mau System kapiere, gloub ou ganz nöch vo de Schou und em Strand... :)

Ach d Hawaiianer sind alli soo fründlich! I jedem Shop wirsch mit lächle begrüsst, alli sind entspannt und richtig süss :) Jede höuft der und isch Grundlos eifach nett. Sogar wenn i öpper iloufsch, entschuldigt dä sich no bi dir! So als schwiizer chasch da nur stune 😄

Es git soo cooli Läde da, zum bsp.: cha mer sini eigete Flipflops gstalte 😄
Shope da macht spass - vorallem wemmer de victoria secret entdeckt het! 


1. mau im Meer, 28.9.14

Erkundigungs Tag nummer 2 startet! Ja das mit em Bus hemmer immer no nid so im Griff... Aso Bushaltestelle hend kei Name und es git ou niergens en Planübersicht. Mer weiss ou nid gnau wenn de Bus fahrt... Es gäb anschienend es App aber so ohni Internet :) aber ou das wird de no klappte!


Mir hend üs aso bewafnnet mit Starbucks-Caffee uf as Meer gmacht! Bade im Meer isch wie immer herrlich , abkühlend ischs aber nid :) meh so badwanne!

Mh mer cha aber sogar frühre in Hawaii :) i de Büs und Shops! Aso Klimaalage funktioniere sehr gut!

Läbesmittu :)

Ja mer cha in Hawaii/Amerika mehreri Stund eifach im Supermarkt umeloufe und mau das ungloubliche Agebot studiere...
So gut wie alles isch im Doose oder gfrohre! 
Und alles isch gsüsst! Klar es git ou vo allem en light Version das heisst eifach so föu wie: Es het "nur"
so föu fett din wie bi üs normal... Aber sicher ou no Zucker!
Es git aber wirklich ou total lustigi Sache wie Käs i de Sprühdose 😄
Und XXL-Pack mit süssem! 😋

Ah und natürlich steit neb jedem Pris ou ganz gross Kaloriezahl! 😄

Sowit alles sehr unterhaltsam, nur wemmer wet was zum znacht choufe, wo gsund isch wirds sehr schwierig oder
tür! Jaja das isch üs no chli es rätsel... 😁

Schou 😄 29.9.14

Puh de erst Schueltag überlebt! Ok ja es isch sehr locker gsi vo 8.30 bis 11.30 und eigentlich hemmer nur dä Istufigstest gmacht... 😄 gset alles ganz nett aus... 
In de Schou hets föu Schwiizer und dä Rest sind Asiate (japaner) ... 
As Meer simmer natürlich ou, bei traumhaft kitschigem Wätter! 
So jetzt no en gross Ichouf im Wallmart fürs znacht und zukünftige zmorge und de hei! 😘

Japaner & Schou, 30.9.14

Mini Klass besteit us mir und no einer Schwizerin und de rest sind Japaner! Und ich säg euch das englisch 😄

Es muss scho deprimierend sie, die meiste i der Klass sind sit mehrere Mönet in Hawaii! Zersch lernt mer Buchstabe,
den Schriebe und denn Englisch... Aso sie lernet sit 5 mönet englisch und sitze jetzt mit mir i de Klass! 😁
Ja de unterricht isch sehr easy und leger... Mer redt chli, macht paar übige, het pouse (5min = ca. 15 min)
und ja alli sind nett und gut druf!
Sowit also alles super, nur ke ahnig wie föu englisch ich da lehre 😝

Surfen <3 <3 <3

Oh wow üsi ersti Surfstund hemmer hüt ga! :)

Ja es isch u astrengend und mer ribscht sich die ganze ärm uf, ja da macht weh... Aber wenn de uf em Brett steisch und so mit de Welle übers mehr "rasisch" (ja mer sie nid sooo schnöu gsi) de lohnt sich da alle mal!!! :)

Fitness :)

So dä Itrag wid mich dir Janina😄

Mir hend hüt es Fitnessabo glöst im 24studio (aso ja das het wirklich 24 stund offe) und hend denkt mer probiere
das mau so us!
Riesig, tolli grät alles wie mers so könnt! 

Oh und es het ou Bodypum, was i gli wirde usprobiere! 
Hüt hemmer de kurs Bodyatack testet, ui dä name macht em alli ehr!!!
60 min non-stop gumpe, hüpfe, renne, kicke usw. zu mau wirklich guter und luter Musig und die trainerin het
aso alles gä mit motiviere! 
So es richtig krass herts ami training wie ders i de schwiiz nid chasch vorstöue! Ja bi bo selte so kaputt
gsi und ou d fabienne isch doch recht kaputt gsi! 😝

Kuli'ou'ou, 4.10.14

Mir sind hend höt en Wanderig, aso ja meh em jogging-tour uf 700m ue gmacht! Bi gloub no nie so schnöu eh Berg ue, kes wunder hend bi dem Schouprogramm nur d Schwiizer mitgmacht und alli Japaner kniffe... 😄


Aber es het sich glohnt, die ussicht isch scho de wahnsinn gsi! 😍

Damit mer ou hend möge Wandere, hemmer üs so es richtigs amerikanischs Zmorge mit Pancake gönnt. Mhhh fein gsi! :)

Und de hmmer no es Auto gmietet, da mer morn zu 4 ad nord shore (stränd ganz im norde vo de insle) wönd fahre... Freu mi total 👏😄
Pancakes 😍
Pancakes 😍

Weekend mit Haie und Schildkröt, 5.10.14

6.00 Uhr: Start i Tag damit mer am 7ni chönd abfahre Richtig i Norde vo de Insle. Mit em Cabrio (sehr windigi Sach, aber tooolll) geits zu 4 los.

Paul am fahre und mir am Sunne gniesse!

Mir sind üs grad mau als ersts go amelde fürs „shark diving“, das mer das ou sicher chöi mache!

Denn hemmer üs en tolle Strand & Riff gsucht um üsi neu Schnorchelusrüstig us em Wallmart ;) (Aldi ähnlich) und unterwasserkamera z teste! Ah es sind eifach scho u schöni Stränd da… Es het aber recht Wälle ga und drum ischs ou eher trüb gsi… Mir hend aber doch paar u schöni Fisch gsi und d Fabienne het fliessig gfötelet…

Denn am 1 simmer ebe mit de Haie go tauche! Het u Spass gmacht und isch echt spannend gsi! Has mer aber gfährlicher vorgstöut ga als das denn gsi isch. Die Haie (zw. 1 – 5 Meter gross) sind eigentlich sehr ruhig gsi und eifach um das Käfig, wo mir dinne gsi sind, umegschwumme.

Isch wirkkich u cool gsi, sind scho faszinierendi Tier! Und ja ich ha gut glugt - d Fabienne het ou keine gstreichlet!!!

Nach eme richtige Shrimpsmenu vom Shrimpstruck (ala Hawaii 5-0) simmer de wieder go Schnorchle mit de chline Hoffnig no en Schildkrot z gse!

Es isch ja so wenn mer eini gsäch, söt mer abstand ha und daf sie uf kei Fau wöwe streichelä... Naja aber d Fabienne het da nid ganz befolgt, het aber ou nüd defür chönne! Mir sind friedlich am schnorchle gsi, da isch sie grammt worde! :) Sie het zersch gmeint mir sige das gsi und het scho wöwe de Paul zäme schiesse, da gset sie die riesig (ca. 1 meter längi) Schildkrott!

So es schöns Tier!!! Mir sind denn mit ihre umegschwumme und hend föu Fotos gmacht!

Nach relativ föu Salzwasser und überall Sand hemmer üs no es leckers Znacht im Steakhouse gönnt und denn hei und tot müäd is Bett…


scho wieder Fritig... 10.10.14

Scho wieder en Wuche ume... Langsam hemmer ou en Rhythmus gfunde: Schou am morge, denn was Esse, denn Strand, Meer, Strand oder Fitness und denn was leckers Esse, ja no chli lehre und schlafe :) Schöne isch eifach dra, mer muss nüd... Egal wenn was nümme ie mag oder mer spontan Andersch plant... Mer cha mau so richtig nach Lust und Lune läbe!

Ja d Schou isch ou nur am Morge und geit meistens schnöu ume... Mer lert doch recht föu und isch ou alkles ganz ok, aber d Schou isch nid bsunders gut. Aso es isch eifach so, das mer Unit für Unit im Buch düre macht und das wars... Aso Spieli oder mau Föum oder süsch spannends wo de Unterricht würd abwechsligsrich gstalte, hets leider nid. Aber ja sind ja nur 4 Stund pro Tag :)


Das mit em Esse hemmer ou bald dusse, es isch eifach günstiger usswärts z esse :) und Papaya isch eis vo üsne houptnahrigsmittel :)


Die Wuche simmer no mit de Schou-Aktivität am ne andere Strand gsi, chli witter wäg vo de Stadt... Ja Hawaii het scho sehr schöni Ort! :)


Das Wucheend gömmer a es Football spöu, simmer mau gspannt wie da wird und Sunntig spontan, aueg a Strand! :) Und nächst Weekend werde mer aueg uf d Nachbersinsle Kauai flüge, freu mi scho total...

Weekend - BBQ & Football

Football... Tolli sach aber nid so mis Spöu! Aso s BBQ und d Lüt und alles rundume isch toll! Und ja es isch 
wie bi Gilmore (eifach ohni de Privatkoch :)! Jede chunt mit sim riese Outo, bout Zäut und Grill uf und macht 
es BBQ... Das isch suuuper gsi!  
Ebe unds Spöu naja, duret sehr lang und ja ... :)

Gester simmer, wie sichs am ne Sunntig ghört, wieder richtig go zmôrgele! Mhh pancake sind scho was tolls! 
:)

Denn id Hanamua Bay, das isch es Riff entschande us eme Vulkanusbruch... Ach es isch so schön zum schnorchle, 
mer gset aui Farbe vo Fisch und Seegurke, Igel und mer hend da grosse Gluck ga wieder en Schöudkrot z gse! 
Eifach schöni Tier! 
Am Abe mit frozzenjoghurt a Strand hocke und dä (doch sehr kitschig, de  Fabienne eher zu kitschig) Sunneuntergang luege ... <3

Knobli, knobli und meh knobli

Liebi Siliva du chusch mer immer mau wieder i Sinn da! Ich meine ich mag Knobli, isch es feins Gwürz aber mer 
chas ou übertriebe!😄 Aso d Hawaiianer liebes wirklich, so gut wie alles isch demit gwürzt und de nid grad 
wenig!  
Mau luege viellich schliessich ich mich nach dene 3 Mönet dir a Silvia mit de Meinig öber Knobli :)

Und dir liebe Grossdàdi würds da ou gfaue! Es git immer und überall Shrimps :) Shrimps als Bilag, im Salat, 
i de Suppe, als Spiessli, als Vorspies oder du holsch eifach grad bim Shrimpstruck en ganzi Portion nur Shrimps! 
Ach und sie sind sooooo fein :)

Surfe <3 <3 <3

Hüt hemmer wieder es Bord gmietet und sind use paddlet ... Ah es isch eifach scho cool uf eme Bord z hocke und ja Paddle isch no immer astrengend! :)


D Fabienne isch ganzi 3 mau gsurft  .. somega cool! Leider het sie ou wieder rechti blessure devo, aber sie könnt ja ke Schmerze ;) 

DA für euch no es hammer Foto :) 

Fabienne 😍
Fabienne 😍

Kauai, 17.10. - 19.10.14

Fritig morge am 6i hemmer scho müsse ufstah, da mer am 8.30 uf Kauai gflige sie! 😄
Nach nur 25 Minute Flug simmer denn ou scho acho! 
Mit eme u sexy rote Mustang Cabrio fahre mer i üses hübsche Hotel und den geits los mit Inselerkundigung! 
Da er fürs Wucheend sehr schlechs Wetter (Hurikan) gmeldet het, hei mer föu plant am Fritig! 
Kauai isch wunderschön! Sehr verschlafe und alles gset chli us wie im wöude Weste! 
Es isch alles u mega grün, teilwies sogar chli Jungel ähnlich und es het unendlich föu schöni & sehr leeri Stränd! 
Mer fahre mau alles chli ab, halte überall a und gniesse s herrliche Wetter! Ab und zue chli Schnorchle und immer chli Fötele! 😄

Am Samstig hemmer den (mit chli Rege) de Waimea Canyon befahre! U schön und sehr beidruckend! 
Vorrallem Regäböge vo obe z gse, isch super gsi!
Für die Insle müsste mer eigentlich ganz föu Ziit ha, da mer überau ganz tolli Wandertoure chönt mache! 
Aber ou so isch schön gsi mit Cabrio die grün Insle abzfahre!

Ou s heiflüge isch den trotz "trope Sturm" ruhig gsi! 😄
Dä Sturm het eher eifach a schlechts Wetter i de Schwiiz aber doch bi 28 Grad erinneret! 😉

Ah was i fasch vergässe ha, d Kolosnuss-Story: 
Mer cha in Hawaii überall früschi Kukusnüss koufe, es wird es Loch boort - mer cha sie ustrinke, denn zrugg gä, sie wird ufgschnitte und mer chunts Fleisch no über - was sehr feins! 😋

Denn in Kauai hemmer so Kokosnüss am Strand gfunde... Ihr döfit rate, genau d Fabienne hets de mit sehr föu Körperisatz, höuf vo Spitzestei und gfühlte Stunde gschafft so e Kokosnuss ufztue und ja es isch föu föu feiner gsi als die kouft i 😉 so richtig überläbens-survival-kokosnuss-action gsi! 😄

Stand Up Paddling, 26.10.14

Evtl. könnit ihr ja die Sportart, das ja bi üs en Ziitlang ou sehr beliebt gsi isch... Da in Hawaii gset mers aso ou sehr oft, neb de ganze Surfer übera Lüt wo meistens recht schnöu uf ihrne Bretter stehend uf em Meer ume paddle...


Gut mer probiere da natürlich ou us! 😄
Sehr en witzigi aglegeheit und gar nid so eifach! Aso s erste Problem mer müsst es guts glichgwicht ha für die Sportart und s zweite Problem es sött eim nid schlecht werde wenns so schouklet! 😜
Ja ihr hends erkönnt das isch nid so ganz üsi Sportart aber mer hends sehr lustig ga und sind immer mau wieder abtaucht, schlussendlich ou meh "Kajak" gfahre de mit als SUP gmacht 😄
Und als legschst für aui wo das mau uf em Meer wöi mache, luget zersch wie de Wäuegang und de Wind usw. so isch... Mir sind de plötzlich recht wit usse gsi und ja säge mer so mir hei de ou no recht Sport gmacht! 

1 Monät isch scho vorbie...

Da warens nur noch 8...


Ziit louft schnöu und ja mer schaffts ou im Paradis en Alltagrythmus z becho und es cha eim ou da aschiss ufzstah und id Schou z ga aaaaber de het mer wieder frei, es isch immer so 30 und meh Grad, es het es Meer u Strand und mer merk mer muss eigentlich so gar nüd! A das chönt mer sich gwöhne! 😄

Mir hei e ruighi Wuche ga mit föu Stran, Sunne und ou Fitnesscenter bsüch... Am Fritig simmer am Schou-BBQ gsi und hend fliessig mit aune Japaner/ Japanerinne und Koreaner englisch gredt! En friedliche Abe gsi! 

Samstig simmer i nes Outlet chli go shoppe und Sunntig denn en ganz fridliche Tag mit Strand und ebe SUP 😄
Abschluss simmer no im Red Lobster go fein ässe gsi! 
So und morn isch scho wieder Mäntig, wünsche euch e tolle Tag - ich schlafe mau!

Ah und ps: es sind jetzt nur no 11h zittverschiebig nur so nebebie... 😘

Halloween - 31.10.14

So ich melde mich ou mau wieder...

Crazy Halloween hemmer aso gut überstande! Isch en lustigi Schouparty gsi und nachher uf de Strasse het mer föu wirklich super Kostüm gse! Ja Halloween macht Spass und die Lüt da flippe richtig us! Aaaber wemmer üsi Fasnacht könnt, isch dä einti Halloween-Abe so ohni Musig überall und ohni Essens- und Drinkständ aso scho en magere Abklatsch... :) Nur öppis chönte mer i de Schwiz wirklich ou iführe - Temperatur! Aso Fasnacht "Halloween" so im Hochsommer bi "30" isch scho was tolls! :)

Und mer hend natürlich ou super usgse :) das Kunstblut und die tolle Vampierzähn wo mer da cha choufe sind de hammer! Sie hebe sehr gut und gsänd toll us aber Esse und Drinke de mit isch üsserscht schwierig - das cha ni jetzt us Erfahrig brichte! :)

D Fabienne isch mit ihrem Wonder Woman Kostüm natürlich ou sehr gut acho, da jede Amerikaner das sehr gut könnt (Marvel Comic) und het doch paar Hüratsaträg becho ;)


S Wocheend hemmer de mau wieder wie es so en richtige "Sommerferie-Strand-Meer-Tag" gstautet! Am Samstig simmer go Schnorchle wieder i die wunderschön Hanauma Bay hend hei wieder das Glück ga en Schöudkrott z gse... Am Sunntig simmer go Surfe (het Spass gmacht) und denn en richtig fuule sünneli Tag am Meer gmacht... 


Gester het den ou scho die 6. Wuche gstartet... Scho glie isch Haubziit...

Am Namitag hemmer mal was Historisch's gmacht und sind die berühmti Statue "King-Kamehameha" unds historische Museum go aluege. (Die Statue könnt übrigens jede sehr gut, wo Hawaii 5-0 lugt :) - Bild folgt dezue).


Hüt simmer zu Wasserfäu gwanderet und gsi go Bade, sehr schön gsi! Het aber recht so ad Natur vo de Schwiiz erinneret! :) Aso isch sehr ähnlich gsie, wie dä wunderschön Ort bi de Riarena im Tessin (könn ich dank de Fabienne) nur das s Wasser da föööu wärmer gsi isch! :)


Haha aber obers gloubet oder nid, es isch scho so wit, das d Fabienne und ich ou in Hawaii teilwis frühre, so ab und zue am Abe oder wenns fest windet... Haha das wird lustig wemmer retour id Schwiiz chöme! ;)


Ich ha mi ja scho sehr a alli die Japaner da gwönt, sie sind ou wirklich ganz andersch als die Chinese wo mer so us Luzern könnt... Föu fründlicher, ruhiger und sympatischer! Aber gester hemmer wieder was ganz lustigs im Bus mit Japanische-Touriste erläbt: D'Fabienne, d'Jasmin und ich sitze nebenand im Bus (ja das isch interessant da mer blondi-, bruni- und roti-Haar hend) und denn faht de Japaner vis a vie ohni z fräge a üs z fötele ... ok chli lustig aber ke Problem... Denn steit sini Frou uf (im Bus) und hockt eifach (ohni Kommentar) zwüsche mich und d'Jasmin ie (aso gnauer gseit uf üsi Bei ue) und faht a Pouse und ihre Maa fötelet das... Mer münd gloub so doof dri glugt ha :) Denn seit sie "thank you" und hockt wieder zu ihrem Maa... A bitte bitte kei Problem, immer gern doch :) :) :)


Süsch Grundsätzlich mag ich das Volk da sehr. Aso uf de eine Site die ganze Japaner und süsch d Amerikaner. Mer het ja doch so paar Vorurteil Amerikaner gegenüber... Jedefalls mich hets sehr überrascht wie fründlich das Volk isch. Dafür gits ganz föu Biespöu, eis wär wie de behinderte Lüt da ghoufe wird, o jede Bus isch top usgrüstet für Rollstöu und alli Lüt mache immer Platz wenn en Rollstuhl chunt... Oder ou wemmer mau was uslährt, lat la gheie, Lüt da höufe eim grad ufläse, putze usw.

Sogar dene sehr sehr föune Obdachlose wos da hed wird ghoufe... Nid wirklich vom System her aber d Lüt da sind ou dene gegenüber hilfsbereit!


Was ich wirklich ou super finde (wo d'Schwiz gern ou chönt iführe): Wemmer i nes Restaurant chunt, bechunt jede grad als 1. eifach mau es Glas Wasser uf e Tisch (das wird ou immer wieder nahgfüllt und kostet nüd!) und allgemein egal was mer z trinke bstöut, mehr zahlt nur 1 Glas und nachher wird immer wieder ufgföut (so IKEA Styl) :)


Übrigens in Hawaii isch ja jetzt ou November, auso ou Vor-Wiehnachtsziit und so isch jetzt ou alles dekoriert. Es louft Wiehnachtsmusig i de Läde, es isch wiehnachtlich Dekoriert und im Starbucks gits jetzt d Wiehnachtskaffe mit de Wiehnachtsbächer... Bi üs findi ich ja scho das es ame glie isch so Afangs November aber da in Hawaii chunt eim das ja scho sehr speziell vor :) Bi gloub no nie soooo nid in Wiehanchts-Stimmig gsi! :) :)


So muss no chli Husufgabe mache... Medle mich de wieder  - bis bald und euch en guti Ziit!

Sunnigi Hawaii-Grüässli

Halloween 🎃🎃🎃
Halloween 🎃🎃🎃

First-Friday in Chinatown, 7.11.14

En hammer Tag! Mir starte mau mit Usschlafe (da mer üs am Vorabe verfahre und verloffe hei 😄 und schlussendlich es Taxi - wo grad am tanke gsi isch - üs gretted het, isch es sehr spät worde...) denn simmer uf die 10ni is Kino!
Ja genau mer cha am Morge is Kino und mer isch de ou nid elei oder ne, de haub Kinosaal isch voll gsi 😄

Nach sehr föu Popcorn und ou zimli k.o. (Evtl. sött mer wemmer schlecht englisch cha, nid grad en 3h Science-Fiction go luege - Interatellar) simmer de chli a Strand üs go erhole 😄

Später hemmer üs de mit de Jasmin und de Katharina troffe um ebe nach Chinatown z ga! Immer am 1. Fritig im Monet isch in Chinatown so chli special Situation... Es het überall Kunstustöugige, Livemusik, herzigi Restaurant und aui Botique hend länger offe...

Weekend mit föu Programm!

Mir sind zu 7 unterwegs - mit eme riese Ami-Auto... Mer fahre mau alles im Meer entlang mit em Ziel die zwei berühmtischte und schönste Stränd vo Oahu (Sandy Beach und Lanikai) go z bsuche...
Und ja sie sind schön! Da mer ja scho November hei, hets jetzt immer meh Wind und Wäue da und grad am Sandybeach hets u spass gmacht chli go i de Welle umetouche... Lanikai isch hingege ganz en ruhige Beach und so wie mer sichs haut so vorstöut, perfekte fine wisse Sand und klars türkis Wasser! 😍

Am Abe simmer was chlises go Esse und de gli is Bett da mer am Sunntif früh los hei wöwe!

Sunntig morge am 5i simmer uf, um rechtzitig für e Sonneufgang uf em Dimond Head (frühcher mau en Vulkan gsi - jetzt so de Husberg vo Waikiki und sehr beliebt bi de Asiate)!
Aso wandere het mer das nid chönne nenne, am 6i isch eifachs Tor ufgange und denn het mer i Masse vo Japaner müsse hindernah schuene und das sehr langsam...! 
D Ussicht dobe und de Sunneufgang isch denn natürlich scho sehr schön gsi! Es het sich aso glich glohnt aber ebe scho speziell - ungefähr so wie uf em Pilatus obe die mit de Absätzschuh... Fabienne het de ou gmeint naja aso de Sunneufgang sig scho chli zu kitschig 😉


So u de hets es woverdients riese zMorge mit Pancakes gä 😄
Anschliessend mau wieder go Schnorchle ide Hanauma Bay (die andere hend da no nid könnt...) Mir sind übrigens ou sehr en lustigi Gruppe gsi: Mir zu 4. als schwizer Froue, denn 50. Jährig Italiener, denn en Spanier und no en Japaner 😄 Super sach gsi!
So nachher simmer richtig Norde, hend no en Stopp bi de Annanassplantage gmacht, um suuuper Glace z esse! 😋 
Und denn simmer im Norde bi de Waimea Bay go die unglaublich krass grosse Wäue go beobachte und chli sünnele... 😍

Ah was i no ha wöwe erwähne, es isch jetzt bi üs chöuter worde! Am Abe brucht mer jetzt es Jäggli und i de Nacht längets Lintuch nümme... Aso wirklich früschi sach 😉😄

Hula-Lektion, 😄 13.11.14

So mir sind jetzt doch mau no im Hula gsi 😄 schliesslich muss mer das wie surfe eifach mau gmacht ha! 😉
Naja abgse devo das d Fabienne und ich allgemein nid bsunders chöi tanze und denn ou no sehr schlecht sind in koordination vo ärm und bei glich ziitig... Hets ganz Spass gmacht! Isch wirklich no lustig gsi und Hula isch en Usdruckstanz und jedi Bewegig het en bedütig, um en Gschichts verzöue... 😄
Erklärig zum Hula-Tanz
Erklärig zum Hula-Tanz
Mer hends gschafft und sind jetzt so richtig in Hawaii-time! 😄
Mir bruche jetzt ou ganz 24 Sekunde um en Fussgängerstreife z überquere, wieso sött mer en Rolltreppe ueloufe - sie fahrt ja! Wieso uf en Bus prässiere, es chunt ja wieder eine und wieso sich ufrege wenn uf din Kaffee im Gorilla nid übertriebe 20 Minute musch warte, du hesch ja eh Ziit! 😝
Ja aui wo mich könne, münd sicher lache da ich ja eher ungeduldige Mönsch bi 😄 ja ich bin denn sicher i de Schwiiz ou chli relaxter (aso emu am Afang) 😉

Weekend und da warens nur noch 5 Wochen!

Mir sind gester gsi go Kayak fahre! Es het so Spass gmacht, wunderschön gsi! In Lanikai (berühmte Strand uf Oahu) chamer Kayaks miete und denn uf chlini unbewohnti Insle use fahre...
Mir sind zu 7 unterwegs gsi und d Fabienne het denn elei paddlet, aber sie het en guete gmacht! Als einzigi vo üs isch sie nämlich nid kenteret! 😄
(Isch aber nid so tragisch gsi, alles no ganz - nur d Sunnebröue hemmer verlohre, naja bi mir halb so tragisch isch 50$ gsi aber de Kollegin ihri isch en Gucci gsi für 400$ 😣😁 - naja wieso mer so en Bröue zum Kayake aleit oder besser wieso mer überhaupt so eini kouft isch en anderi frag 😉) 
Abgse de vo isch en hammer Tag gsi und mer hend föu Spass ga! 

Homeless people

Öppis wo ich wirklich nid wirde vermisse und wo mi ou sicher nid wirde dra gwöhne sind die viele viele Obdachlose da...! S Problem isch eigentlich nid mal das Obdachlos sind und überall bettle - sondern eher das die meiste ou no zihmli verletzt oder krank sind unds echt u meeega grusig usgset was die teilwies für wunde hei! 
Und vom gstank red ich jetzt mau gar nid... (Alli wo de pendler vo wolhuse a mit em plüschtierli könne - da schmöcke aui so schlimm!) 😫
Und sie sind überall und du gsesch sie immer wieder und mer het echt nur no das Bedürfniss - irgend was z mache degegee! 😔😢
D Fabienne het i de Schou ou erfahre, dass uf em Festland de Obdachlose One-way-tickets nach Hawaii schenke, um sie so los z werde - naja suuuper Lösig! 

Aso uf das freu mi echt i de Schwiiz, kei so Lüt meh wo vor sich hin vegetiere!

Pearl Harbor und Japan BBQ, 22.11.14

So jetzt hemmer das "Pflichtprogramm" Pearl Harbor doch ou no erledigt! Mh ja mer könnt ja Gschicht scho sehr gut und das ganze isch recht patriotisch gse und doch glich intressant! 
S Memorial isch sehr schön! Das isch für alli wos nid könne - die wiss länglich Gedänkstette wo as gsunkne Schiff USS Arizzona und die über 1000 gfallne Marinelüt erinneret! Das Memorial isch ou genau überem Schiffsfrack bout! Komisch hemmer gfunde, das mer nüd gege das täglich uslaufende Öl macht, aber anschienend isch das nid so schlimm...
Süsch s U-Boot isch sehr eng und ich stöu mers üsserscht unagnehm vor i dem für längeri Ziit müsse z Lebe, da isch üses Zimmer grad riesig degege! Mer cha ou s grosse Schlachtschiff go aluege - ja es isch riesig und recht beeidruckend! Mer cha so richtig grusigi typischi Amerikanischi Hotdogs esse, wo d Essiggurke genau wie ou de Senf unds Ketchup us de Dose chasch usedrücke! 😝

Am abe hemmer üs no mit de Yuri troffe, Schoukollegib vo de Fabienne und sie het üs ihres lieblings Restaurant zeigt! "Japan BBQ Gyu-Kaku" isch mega fein und cool gsi det! Eigentlich isch es en Art Tischgrill und du machsch der dis eigete BBQ! Mega fein gsi und mer hei en unmengi a Fleisch gässe! Super abe gsi! 😋

Am Sunntig simmer friedlich go zmörgele und hei üs nachher wn gmütliche Strand tag gmacht! 😍

Letzt Monat het agfange! 😔

Soo mir hend die Wuche üse 4. legst gstartet und Ziit wird jetzt schnöu ga... die Wuche hemmer eh nur 3 Täg Schou, da in Amerika am Donnstig Thansgiving isch und am Fritig Black Friday! 
Mer sind bi dr Kollegin ihrer Gastfamilie zum Thansgiving dinner iglade - bin ja mau gspannt! ☺️
Und anschliessend gömmer go shoppe, da d Läde genau um Mitternach beginn Blackfriday ufmache! Muss echt crazy sie denn, alles isch abegsetzt und es muss ungloublichi Schnäpplo gä und alli warte znacht vor de Läde usw. mir sie aso gspannt druf! 😁😄

Die Wuche isch ou no d Fabienne Felder acho in Hawaii, en Kollegin is Schüpfe wo am Reise isch uf em Festland und spontan entshiede het üs id wärmi cho z bsuche 😄 
Hihi no komisch sie da z treffe aber cool! 

Gester simmer mau wieder im Kino gsi, scho üse 3. Föum ☺️ aso de 1. isch ja "Interstellar" gsi - naja sehr läng und üsserst schwierig zum verstah aueg ou uf dütsch kompliziert aber in englisch 😵 denn simmer de neu Disney "Big hero 6" go luege, dä isch super gsi - da versteit mer aues! 😄 Und jetzt gester simmer "Die Tribute von Panem 3 - Mockingjay" gsi go luege und da mers Buch beidi glese hend, hemmer de Föum sehr gut verstande! 😄 Isch cool gsi! 😄

Thanksgiving & Black Friday, 27.11.14

Mir sind zum Thanksgiving Esse bi de Gastfamilie vo de Jasmin iglade worde! Als Danke hemmer versproche was us de Schwiiz z choche oder z bache... Mh wemmer denn mau es schwizer Rezept sucht wo ohni Käs isch, merkt mer isch no schwierig... Vo älplermagrone über cholera oder süsch was ou immer! Jedefalls hemmer üs für Öpfuwähie entschiede... Naja ganz gut usecho aber es het leider kei magerquark gä... Aber er isch fein gsi!
Die Family wohnt u schön, i so me typische chline local Hus mit ganz föu Charm und mer het en wahnsinns Ussicht! 😍
Es het denn natürlich ou es riese Esse gä mit föu Truthan! Isch aso sehr fein gsi! chli föu Lüt sind iglade gsi, irgedwie hets überall Lüt ga und ke ahnig wer das alles gsi isch! Aber isch so im ganze en schöne  Abe gsi!
Uf die 12i (znacht) hemmer üs de mit de andere Mädels im Ala Moana Shoppinhcenter troffe! Am Blackfriday hend d läde ebe 24h offe -start 00:00 Uhr und die meiste hend mega cooli Rabatt oder Sonderagebot... Ja es hetsch öu Lüt ga aber has mer no chli schlimmer vorgstöut... Es isch so wie bim Wiehnachtsshoppe ungefähr gsi! 
Ja und mer hei natürlich gaaanz föu postet! Das Koffer packe wird toll 🙈🙈

TheBus 🙈🙈🙈

Auso es isch doch Ziit no en Itrag im Bussystem z wittme... Auso ebe das Büs ja immer zu spät chöme isch nüd neus und das sie chöme wenns chömet ou nid und ebe es git ja ou ke Bushaltestöue-Näme a au das hemmer üs ja gut gwöhnnt 😄
Aber gester ha ni wieder was erlebt 😄mir sitze im Bus und en alti Frau isch i gstiege (mit gehöuf) und denn het sie d Haltestöu verpasst wo sie use het müsse - ke Problem de Bus het denn sini Route verlah und isch en Schlaufe gfahre (nid so e chlini, das ebe überall 1bahn isch) um sie denn wieder a de richtige Haltestell use zlah! 😄 Isch ja scho seehr nett! 😂
Oder die ander immer wieder intressant Situation: Buschaffeur haltet ja mängisch wenn er ufs Klo muss oder so... Legst mau het de Chauffer hunger ga und mer hende so bim ne fastfood stand ghalte und er isch sich was z Esse go hole... Ja mer sitzt de im
bus und wartet eifach bis de Chauffeur wieder chunt! 😂Es gits ou das d Chauffer en Pause bruche, den stiegets us und es geit eifach 5-10 Minute bis wieder witter geit...
ihr gse mir sie immer froh, mümmer nid en Zug verwütsche 😄😄

National Memorial Cemetery-Pacific, 29.11.14

Mer hei e Usflug macht zu dem Memorial (Friedhof und Gedänkstätte für d Soldate & Navi) of Hawaii! Isch sehr en schön und doch ou trurige Ort gsi! Alles sehr gepflegt und recht beidruckend, nur scho die riese Flächi vo Gräber! Es het den ou no en Ussichtspunkt ga, wo mer über ganz Honolulu gse hei! Mega schön gsi! 😍 Mer hend aso en gmütliche Tag ga mit ganz föu typische Touri-Föteli!

Morn mache mer en Usflug i Wasserpark! 👏😄

Wasserpark und Manoa falls

Wet'n'wilde Wasserpark isch ganz nach üsem Gschmackt gsi... Es het nid so föu Rutschene wie im Alpamare, defür isch det jedi minimum so "krass" gsi wie die schlimst im Alpamare 😄 ja und isch haut scho hammer so im ne Park verusse mit Palme z sie! Mer frührt ou nie bim asta, da mer ja immer Sunne het! 😜
Hei aso föu spass ga!

Am Mittwoch simmer nach de Schou zu de manoa falls "gwanderet" aso ja isch ca. en 30 minute weg gsi... De Wasserfall isch nid so spektakulär gsi aber de Weg det ene isch durch Jungel ähnlichs Gebiet gange und das isch toll gsi! D Mai en Japanerin us minner Klass isch ou mit cho und sie isch völlig faszniert gsi vo de Fabienne, da sie ohni Problem immer mau wieder irgendwo ue klätteret isch! 😄 Mai isch den ou uf 1 Boum ue mit üs - isch aber en rechti sach gsi 😂 sie het de ou gmeint, das sie no nie uf en Boum ue sig! 😄 
Isch super Abe-programm gsi!

Geburtstag, 5.12.14

Ich ha mich ja scho lang sehr uf mi Geburtstag gfreut, da mer ja ebe plant ga hei go skydive z ga!
Endlich endlich isch sowit gsi... Bi aso scho so chli nervös gsi! 😄 
Ah isch en hammer Tag gsi, agfange mit Chuche u Cherzli (wo ni übrigens im Gschenkli inne vo de Silvia ga ha), denn mit em Auto i Norde und de isch nid lang gange und mer sie scho usgrüstet mit Gstäutli richtig Flugzüg glofe... Ja spätistens jetzt wird mer nervös! Denn simmer so ca 5-10 Min. ue gfloge uf 4000 Meter! D Ussicht isch im Flugi scho de Wahnsinn gsi, nur chli komischs Gfühl haut und das hindertsi Ueflüge isch ou speziell... Ja und de Schiebetüre uf und los geits! Wahnsinn! Echt ungloublich das Gfühl zum Flugzüg usse z gumpe und eifach mau z gheie! (Ok ja es isch viellich scho Fragwürdig, wieso mer das macht 😁) ... Und denn nach churzer Ziit isch de scho de Schirm ufgange!
Ah mir hets sooo gfaue, die Ussicht isch eifach de Hammer gsi! 😍
Leider simmer de ou scho sehr glie wieder am Bode gsi... Aso die andere hend teilw. nid so toll gfunde und würde ou nie meh ga ... D Fabienne und ich aber sofort - ja das überrascht jetzt aueg ou niemer! 😝
Nach eme guete Zmittag und chli verdaue vom Sprung simmer a nächst Strand gfahre, hend Sunne gnosse und aui chli gschlafe! De Sprung und Nervosität het üs recht gschluchet... Anschliessend hemmer üs uf e Weg zum ne versteckte Strand gmacht (Gheimtipp vonnere Mitschüleri gsi) um paar Turtels 🐢🐢🐢 z gse... Nach föu "über Stei chlättere" hemmers ou gfunde und es het 2 Grossi und 4 chlini Schildkrött ga! 😍 So cool gsi, die Tier sind eifach schön und so mega friedlich! Nach föu Föteli und em Sunneuntergang simmer de wieder retour nach Waikiki gfahre!
Als überraschig simmer de no lecker go Japanisch esse - im ne Restaurant wo de Choch grad bi dir am Tisch s Fleisch brutzlet! 😄
Hammer Tag gsi und 1000 Dank ad Fabienne fürs Organisiere und ihres hammer Gschenk! Sie het mer nämmli d Fotos bim Skydive gschenkt! (Wüw ich hät mir die sicher nie gleistet) Also danke!!! 😘😘😘

So jetzt sind no 2 Wuche... Alles wichtige wo mer hei wöue hemmer fasch scho gmacht... D Wanderig uf de Konohead steit no a und Wal- & Delfin gse isch no und das wers de... 
Bald simmer retour i de Schwiiz!

Letschtä Sunntig & wüsts Wätter, 14.12.14

Um die Ziit i 1er Wuche sitze mer scho am Flughafe und warte "warschiendlich" voller Vorfreud, ou chli truurig und mit bitz aschiss uf üse sehr lang Flug hei... Es isch speziell im Moment wüw die legst Wuche isch irgendwie "nur" es abwarte, dass mer heiflüge und glich wett mers no richtig gniesse das ja ebe nur no 1 Wuche isch... 😔
Mer hei jetzt ou mau alles scho Packt wo mer nümme bruche - puh isch das e Sach gsi 😂 aber mer heis wirklich gschafft - ja aueg chli übergepäck aber süsch chunts gut! 

Hüt isch wüst, ja es isch in Hawaii so richtig wüst - de 1. Tag wos durchgehend rägnet und wüsset er was es isch toll! ☺️
Mer cha am Morge mau wieder eifach ewigs im Bett umeliege und es isch nid zu warm! Denn en mega gmütliche Tag mache und immer mau wieder go Kaffee trinke das ja "chaut" isch! 😄

Gester Abe simmer no mit gaanz föu Japanische Schoukollege gsi go Znachtesse, isch en sehr witzige und coole Abe gsi! Ja ich gibs zue ou bitzli astrengend... Ganz gut gsi mer hei x-vorspiese und menüs bstöut, de isch alles id Mitti cho und jede het chli gschöpft aso so es richtigs teile 😄 super Sach gsi und ich ha sooo föu neus probiert! 
😄 üsi neue japanische Kollege! (Kiouski, Aki, Noriko, Chie, Harumi, Minami, Yoshi)
😄 üsi neue japanische Kollege! (Kiouski, Aki, Noriko, Chie, Harumi, Minami, Yoshi)

Letzi Wuche! Start Mäntig am 15.12.14

Üsi legst Wuche het Agfange - ungloublich! Uf em Timer vor Fabienne sind jetzt no 5 Täg und paar Stund und de sitze mer im Flüger! Die Wuche wemmers gmütlich nä und no chli gniesse und doch paar Sache hemmer no vor! 😄
Hüt simmer am Morge schön brav id Schou, da mer legst Wuche aui no s Niveau (ja nur für 2 Wuche) gwechslet hei, mümmer scho no chli ga... Am nami hemmer den nos Delfin-Schnorchle & Walwatchibg reserviert für e Mittwoch - freu mi meega! (Hend das jetzt mit em Geburtstagsgeld und em Reisegeld vo üsne Mädels zahlt - danke aso no mau 😄) Denn hemmer üs es Auto organisiert für hüt und morn, das mer no es letzts mau um d'Insle chöi... Am abe hemmer de no en chline Hike gmacht zum Makapuu Lighthouse - meeega windig gsi und aber ou u mega schön! Grad dank dem Wind und dene Wouke hets so super usgse! 😍

Bootstour am Morge am 6i, 17.12.14

04.30 Uhr het de Wecker glütet! Völlig verpennt simmer de am 5i uf e Bus um pünklich am 5.30 bim Aston Waiki Hotel chönne i Shuttel z stiege... Nach 1h Busfahrt simmer denn endlich im Weste vo de Insle acho und ready für üsi Bootstour gsi... Trotz Müdigkeit und Chäuti simmer mega gspannt gsi! Zum Glück simmer nur e Gruppe vo 4 Japaner, 1 Chinesin und mir 2 gsi - auso ganz friedlich! 
1 Haut isch en Riff gsi, zum Schnorchle wo mer oft Schöidkrött gset - hemmer ou gse! 😄 Und ja s Wasser isch sehr chalt am Morge am 7ni ohni Sunne! 
2 Haut wieder es Riff mit ungloublich föu Fisch und s coole mer hend die chönne füttere - sie hend üs das zur Hand us gfrässe! Aso mer iscj so richtig zmitzt im ne Schwarm gäuber und schwarzer Fisch gsi! 😄
3 Haut wer denn eigentlich en Bucht mit Delfine gsi aber de "Kaptän" het per Funk en Wal meldig becho und de simmer die go suche... Und hei gfunde! Wow! 😍 3 Wal sind a üs vorbie zoge, unglaublich gsi! Immer wieder het mer eifach die riese Rügge und die wunderschöne Schwanzflosse gse! Für üs de Hammer gsi! Ich hät dene Wal no ewigs chöne folge...
Immer im "Winter" aso vo Dezember bis Februar zieh d Wal a Hawaii vorbie - bis zu 1000 ...

Und denn hent Bootscrew ganz i de Nöchi en Schwarm Delfine entdeckt! Nid die übliche vo Hawaii sonder föu grösseri! Ah wow sind scho hammer Tier, so unglaublich friedlich! 😍 Mer hei sie de immer wieder gse und sie sind ou ims Boot ume gsprunge! 
Denn hemmer mit Schnorchel is Meer döffe und hei ganz stöu müsse sie (was leider d asiate nod so kapiert hend) naja jedefalls hemmer sie de gse a üs verbie schwümme... Aber ebe mer muss ganz ruhig sie, da Delfine extremi "schisshase" sind 😄

Abschiid vom Paradis... 😢😄

Hawaii isch ungloublich schön und es isch e hammer Ziit gse! Und doch freu mer üs jetzt uf hei...

Die legst Wuche hemmer no gnosse mit sünnele und cocktails schlürfe, mer hei es Abschidsesse mit all üsne Japanische Fründe ga und e Wiehnachtsparty mit de Schou... Mer hei mit föu Müh ou alles chönne packe und sie startklar gsi! Isch scho eher speziell gsi, wüw mer isch truurig z ga und glich isch die legst Wuche nur es abwarte bis de sowit isch!

Am Flughafe hets de scho Turbulenze gä, e Flug isch gstriche, Reservatione glöschz usw. aber zum Glück hemmer sooo föu Ziit ga und es het de glich no klappet! Die arm Fabienne het ou rechts kämpfe ga, da ihre vo Minute zu Minute schlechter gange isch - Angina und alles andere ou no!

D Flug sie chli astrengend gsi aber mer heis doch hei gschafft (relativ kaputt) aber sie ja de u mega herlich begrüsst worde! Danke aune wo durend mit uf Züri fahre 😉

Und zum Schluss, cool hender mitgläse, mails und im Gästebuch gschriebe - suuper gsi! 😍
Wer no intresse het - es git meh bim Blog Neuseeland!